Os bombeiros do Consorcio Provincial Contraincendios e Salvamento da Coruña, con base en Boiro, en colaboración coa Policía Local e Protección Civil de Rianxo, interviron nun incendio declarado en Araño o pasado 26 de decembro a última hora da tarde. En concerto, tiveron que sufocar as lapas dun lume rexistrado nun galpón lindeiro a unha vivenda no lugar de Pousada, na dita parroquia rianxeira. O incendio foi comunicado por un particular, que deu aviso ao 112 e a partir de aí mobilizouse un operativo coordinado polos bombeiros do parque de Boiro en colaboración coa Policía Local rianxeira e Protección Civil local. As lapas foron extinguidas axiña e, segundo confirmaron os bombeiros e a veciñanza de Pousada, todo quedou nun susto e non houbo que lamentar danos ás persoas.
