O Concello de Boiro ofrece ás persoas desempregadas dúas formacións para o ámbito da hostalería

O Concello de Boiro ofrece formación en Operacións básicas de cociña e Operacións básicas de restaurante e bar, correspondentes ao plan de Accións Formativas para Desempregados (AFD). O prazo de inscrición nos cursos está aberto e pode facerse a través do servizo de Orientación Laboral.

As dúas formacións ofertadas son de nivel 1 e están dirixidas a persoas traballadoras desempregadas. A finais de decembro comeza o de Operacións básicas de cociña, de 368 horas de duración, que inclúe módulos de formación transversal para a integración laboral, a sensibilización ambiental e a igualdade de xénero e oportunidades entre homes e mulleres, así como un módulo de prácticas profesionais non laborais en empresas.

O número máximo de prazas ofertadas é de 15 e para participar é preciso estar inscrito como demandante de emprego no Servizo Público de Emprego de Galicia. Toda a información sobre os cursos AFD no departamento de Orientación Laboral, de xeito presencial, no teléfono 981 84 26 09 ou no enderezo electrónico orientacion.laboral@boiro.org.

O Concello de Boiro ofrece estas accións formativas para persoas desempregadas ao abeiro dunha subvención da Consellería de Emprego e Igualdade da Xunta de Galicia para accións formativas do Plan Formativo para o Emprego.