O Concello de Boiro vén de poñer en marcha unha nova edición do Programa Integrado de Emprego para a anualidade 2021-2022. Trátase dun programa formativo, subvencionado pola Consellería de Emprego e Igualdade da Xunta de Galicia mediante fondos finalistas transferidos polo Servizo Público de Emprego Estatal, dirixido a 100 mulleres desempregadas e inscritas como demandantes de emprego.
O Goberno boirense lembrou que o programa desenvolverase por terceiro ano consecutivo, sendo o obxectivo ofrecer ás participantes accións formativas que lles axuden a atopar unha saída profesional adaptada aos seus obxectivos individuais. A duración do programa é de 12 meses e vaise desenvolver no Viveiro de Empresas e Centro de Formación situado en Espiñeira.
O Programa Integrado de Emprego 2021-2022 conta con módulos formativos en hostalería e restauración; en administración e finanzas e en industria alimentaria, podendo escoller as asistentes o que mellor se adapte ás súas inquedanzas. Ademais da formación específica, o plan conta tamén con módulos transversais orientados á inserción laboral e mellora das habilidades necesarias para o emprego.
As persoas participantes recibirán unha bolsa de asistencia, consistente nunha axuda de 7 euros por día pola asistencia ás diferentes accións do programa. Para fomentar a conciliación e favorecer a participación no Programa vaise levar a cabo unha aposta polo uso das novas tecnoloxías combinando a formación presencial coa online para favorecer a conciliación laboral e familiar.
As persoas interesadas en participar no programa deben inscribirse como demandantes de emprego na Oficina de Emprego e solicitar que se lle asigne o código 930. Para máis información poden contactar directamente coa dirección do Programa Integrado de Emprego do Concello de Boiro nos teléfonos 689 247 963 e 950 042 409 ou no enderezo electrónico orientadorapie@boiro.gal
