O Concello da Pobra do Caramiñal fixo balance dos recentes traballos de urxencia dirixidos á conservación da Torre de Bermúdez, sede do Museo Valle-Inclán e Monumento Histórico-Artístico Nacional, amais de Ben de Interese Cultural (BIC). Segundo fixo saber o Goberno local, levouse a cabo unha intervención focalizada na cuberta da Torre de Bermúdez.
O alcalde, Xosé Lois Piñeiro (Nós Pobra), e a concelleira da Cultura, Patricia Lojo (PSdeG-PSOE), explicaron que os traballos centralizáronse na cuberta do torreón propiamente dito “para evitar filtracións”, polo cal leváronse a cabo traballos de retirada da vexetación existente e substitución das tellas desprendidas e rotas.
A dita actuación foi executada por Constrios S.L., por un importe de 5 687 euros, IVE incluído.
Anunciaron, ademais, a previsión de que as tarefas prosigan en 2022 na cuberta da zona expositiva anexa á torre.
Tamén indicaron que dende a Administración local estase a estudar un convenio coa Consellería da Cultura que contempla a restauración de tódalas fachadas e a recuperación da pedra do inmóbel. Neste senso, trasladaron o compromiso por parte do Concello para protexer o patrimonio público.
