O alcalde de Boiro, José Ramón Romero, e o concelleiro de Urbanismo, Luís Ruiz, visitaron o IES A Cachada na mañá deste luns 13 de decembro para conversar co alumnado sobre os proxectos que se desenvolveron no propio centro docente, que participa en diferentes proxectos de innovación educativa.
Un destes proxectos leva por nome Boihouse e, con el, o alumnado de 3º da ESO na materia de tecnoloxía está a realizar un estudo para deseñar propostas urbanísticas e medioambientais que melloren o municipio dende un punto de vista ecolóxico e sustentábel.
As e os estudantes amosaron a José Ramón Romero e a Luís Ruiz os detalles das propostas nas que están a traballar na aula “para un Boiro máis sustentábel e con meirande calidade de vida”, e que contemplan unha posta a punto do transporte público e máis a ampliación do carril bici para reducir a mobilidade en vehículos privados e as emisións; segundos usos para os edificios municipais ou a implementación das TIC (Tecnoloxías da Información e a Comunicación) na xestión municipal.
O alumnado está traballando tamén, mediante o Equipo de Dinamización da Lingua, na creación dun fondo bibliográfico no que se recollan as publicacións sobre o concello. O proxecto Biblioteca Boiro ten como obxectivos divulgar as publicacións locais, afondar no coñecemento do patrimonio cultural, histórico e paisaxístico e ofrecer material e recursos didácticos aos departamentos.
Amais, o persoal do departamento de medio ambiente realizou este luns 13 de decembro dúas charlas para o alumnado de 3º da ESO sobre o abastecemento da auga e o saneamento. O obxectivo destas charlas foi mostrar as distintas fases do subministro da auga que compoñen o seu ciclo e dar a coñecer cales son os problemas que poden ocasionar as malas prácticas no mantemento da rede.
