Natalia Crespo gaña a primeira edición do concurso de postais do Nadal Navivolei

A cerimonia de entrega de premios da primeira edición do concurso de postais do Nadal Navivolei, organizado pola conserveira JEALSA e o Boiro Voleibol, celebrouse este mércores 22 de decembro no Pavillón da Cachada. No certame Natalia Crespo obtivo finalmente o primeiro posto e, desta maneira, o seu deseño será o que ilustre a postal oficial do Boiro Voleibol. Bautista García e Alba Segade completaron a lista de premiados.

Participaron na entrega dos galardóns Margarita Hermo, directora de Relacións Institucionais de JEALSA; Rafael García, xerente da Libraría El Cisne; e Alan Davila e Renan Levandoski, xogadores do Rotogal Boiro Voleibol. Todas persoas que presentaron creacións ao abeiro desta iniciativa recibiron un estoxo de produtos de JEALSA. Ademais, tamén se repartiron lotes de material escolar proporcionados pola Libraría El Cisne.

A primeira edición de Navivolei estivo dirixida a nenos e nenas menores de 15 anos. O xurado que elixiu os mellores deseños estivo composto por Adrián Alves, xogador do Rotogal Boiro Voleibol; Ana Segade, directiva do Boiro Voleibol; e Margarita Hermo, directora de Relacións Institucionais de JEALSA.