María Rivas enxalza o labor das entidades e a cidadanía de Ribeira contra a violencia de xénero

A subdelegada do Goberno na Coruña, María Rivas, estivo este 16 de decembro en Ribeira para participar na primeira reunión da Mesa Local de Coordinación Interinstitucional de Loita contra a Violencia de Xénero, nun acto que contou tamén coa presenza, ao seu carón, do alcalde Manuel Ruiz.

Na xuntanza de traballo, Rivas destacou “que a creación destas mesas é fundamental xa que con elas trátase de establecer estratexias de colaboración que garantan a coordinación das actuacións das distintas administracións e servizos públicos nos labores de prevención, asistencia e persecución dos actos de violencia nos que as vítimas son mulleres”.

A mesa estivo presidida polo alcalde Manuel Ruiz e contou coa participación dunha ducia de integrantes, entre eles os representantes das administracións estatal e galega (a través da subdelegada do Goberno na Coruña, María Rivas, e da secretaria territorial da Delegación Territorial da Xunta, Patricia Rodríguez), técnicos municipais de Servizos Sociais, o CIM e a UAD, membros das Policías Local e Nacional e representantes dos sectores sanitario e da educación.

Durante a reunión acordouse que a mesa teña unha periodicidade de 6 meses e tamén convidar a que se integre na mesma unha representante do Punto de Atención Familiar do Barbanza, unha vez este servizo inicie o seu funcionamento en Ribeira.

A subdelegada do Goberno salientou que no equipo local estean representadas as seguintes entidades e ámbitos de actividade: a Secretaría Xeral de Igualdade, Educación, o estamento xudicial, o SERGAS, a Policía Local, a Policía Nacional, o Centro de Información Municipal (CIM), os Servizos Sociais locais e “todos e todas coa idea de traballar na prevención e na procura coordinada de solucións e medidas”, indicou, lembrando que a loita contra a violencia machista é “unha das prioridades da Subdelegación e dentro desa liña de actuación a constitución das mesas de coordinación é un dos obxectivos principais”.

Viogén

Respecto do servizo Viogén, sistema de seguimento integral dos casos de violencia de xénero, Rivas sinalou que desde a Subdelegación incídese na necesidade da adhesión das policías locais dos concellos ao dito servizo. María Rivas mostrouse confiada en que Ribeira poida incorporarse, á vez que destacou que en tres anos pasouse de tres concellos adheridos ao sistema Viogén a 15, quintuplicando o número. “Son datos e feitos que demostran o compromiso do Goberno na loita contra a violencia de xénero e que tamén pon de manifesto o papel que xogan os concellos nesta loita”, manifestou, para continuar enxalzando “a importancia da decisión e implicación de Ribeira e de todos aqueles concellos que se suman activamente a esta loita e por iso quero volver agradecer ao alcalde a posta en marcha da mesa de coordinación”.

Obxectivos da mesa

O obxectivo principal da mesa de Ribeira será a coordinación dos servizos e dos recursos co fin primordial de actuar na prevención da violencia machista desde “os diferentes ámbitos posíbeis”, o educativo, o sanitario, o policial, os servizos sociais, o institucional. Xunto a iso, porase en común as accións a desenvolver en materia de prevención, coordinando as actuacións nos posíbeis casos de violencia que se detecten, “aínda que nesas situacións é a mesa de coordinación policial, integrada por Policía Nacional e Policía Local, a que ten unha importancia vital”, engadiu Rivas, quen tamén aproveitou a estadía en Ribeira para visitar as instalacións da nova Comisaría da Policía Nacional. Esta visita prodúcese días despois da apertura das mesmas á cidadanía e, por conseguinte, o traslado de efectivos, funcionarios e servizos desde as vellas instalacións ás novas.