Miguel Álvarez.- O Rotogal Boiro Voleibol contará con dous representantes no partido das estrelas da Superliga, que se disputará o 28 de decembro ás seis e media da tarde no Multiusos de Guadalaxara. Trátase do receptor Felipe Benavídez e o oposto José Carlos Romero. Os dous xogadores do conxunto da Cachada poranse ás ordes dos técnicos Lluis Enric Molada (Conectabalear Manacor) e Diego Taboada (Arenal Emevé) no equipo branco.
Felipe Benavídez, que cumpre a súa segunda campaña no Rotogal Boiro Voleibol, foi incluído dúas veces no equipo ideal da xornada na presente tempada. José Carlos Romero, pola súa banda, foi o MVP da sexta xornada do campionato.
A elaboración dos persoais foi realizada polo departamento técnico da Federación Española de Voleibol, que tivo en consideración a distribución das posicións e as estatísticas acumuladas até a sétima xornada da Superliga. Os xogadores do Rotogal Boiro Voleibol terán como compañeiros no partido das estrelas a representantes do Conectabalear Manacor, Melilla, Arenal Emevé, Ushuaïa Eivissa, Teruel e Unicaja Almería.
