A concelleira da Promoción Económica, Charo Varela (Nós Pobra), fixo entrega dos premios ás persoas gañadoras da segunda edición do Concurso de Embelecemento de Balcóns e Fachadas, concibido co obxectivo de “incentivar a participación da veciñanza na ornamentación dos seus balcóns e fachadas, ao mesmo que se contribúe a incrementar o carácter vistoso das rúas nunhas datas tan sinaladas”.
Os galardóns, entregados na xornada deste xoves 23 de decembro, consisten en cadansúas cestas do Nadal valoradas en 300 euros e compostas de produtos locais, buscándose con esta aposta polo comercio de proximidade poñer en valor as vantaxes de mercar preto da casa.
No 22 de decembro déronse a coñecer as vivendas gañadoras desta convocatoria, a cal contou coa participación de 30 fogares con representación de tódalas parroquias do termo municipal.
O xurado, constituído por representantes do tecido asociativo local e de empresas relacionadas coa ornamentación, decidiu que as distincións recaesen nunha vivenda situada no lugar da Pontenaveira (Santa María a Antiga do Caramiñal), noutra da rúa do Castelo (Santiago do Deán), nunha na Mercé (Santo Isidro de Posmarcos), nunha vivenda do lugar de Tarrío (Santa Cruz de Lesón) e noutra na rúa Areos (Santa María do Xobre).
O Concello lembra que a decoración de todos os fogares inscritos deberá permanecer ata o día 6 de xaneiro, inclusive, tal e como se estipula nas bases.
