O Concello de Ribeira emitiu un comunicado para solucionar as dúbidas da cidadanía ante a vindeira celebración da Cabalgata de Reis, fixada como todos os anos para o 5 de xaneiro. Ante a situación xerada novamente pola COVID, que se agravou nos últimos días, dende o Consistorio fixéronse unha serie de cambios para garantir a seguridade da veciñanza e compatibilizar as medidas estritas de control co desenvolvemento da actividade.
Como puntos máis destacábeis, cancélase o Belén Vivinte que se ía celebrar nos soportais da Casa do Concello e múdase de xeito drástico o itinerario da comitiva dos Reis en Ribeira, que só circulará pola fachada marítima. Como elemento extra de seguridade, retransmitirase o evento a través da Internet.
O Goberno local comparte o plan de seguridade na seguinte listaxe de puntos:
- Mantense a circulación do Bus Real polas parroquias cos Reis Magos a bordo nas horas previas á Cabalgata conforme ao horario xa comunicado no ánimo de evitar unha presenza masiva de rapaces na Cabalgata da tarde .
- Anúlase o Belén Vivinte que se ía celebrar ás seis da tarde nos soportais da Casa do Concello.
- A Cabalgata cambia drasticamente o seu percorrido. Unicamente circulará pola fachada marítima, saíndo ás seis da tarde dende o recheo de Malecón e movéndose en dirección as Carolinas (pasando por diante de García Bayón) e volta ata o Malecón, onde os Reis Magos pronunciarán unhas palabras por megafonía.
- Recoméndase encarecidamente no moverse dun único punto e procurando gardar a distancia interpersoal con outras unidades familiares presentes.
- Non se arroxarán caramelos e redúcese o número de persoas que irán en cada carroza.
- Suspéndese a tradicional recepción aos nenos e nenas posterior á Cabalgata.
- O evento será retransmitido por streaming no ánimo de que o poidan presenciar tanto os veciños que permanecen confinados como aqueles que opten por velo dende a súa casa.
Nos próximos días o Concello informará de novos detalles da celebración, que “pode sufrir variacións sobre o aquí comunicado en función da situación”.