O Concello de Dodro vén de informar de que este ano poderase ver en directo, por vez primeira e a través da canle de Youtube municipal, a entrega do XXXIV Premio de Poesía Eusebio Lorenzo Baleirón. As actividades relacionadas coa conclusión desta convocatoria desenvolverase en dúas quendas: este venres 10 de decembro e o sábado 11.
Respecto do programa do venres, comezará ás 20.00 horas no CPI Eusebio Lorenzo Baleirón, coa presentación da obra Urda, de Quico Valeiras, gañador do premio da convocatoria 2020. Complementarase o espectáculo de Aldaolado (as poetas Lucía Aldao e María Lado) Epístola de Aldaolado ás neofalantes. Trátase dunha actividade pertencente á Rede Cultural 2021 da Deputación da Coruña.
Ao día seguinte, 11 de decembro, as actividades comezarán ás 17.30 horas no CPI Eusebio Lorenzo Baleirón. Incluirase a entrega oficial do Premio de Poesía Eusebio Lorenzo Baleirón á escritora Inma López Silva, que se impuxo este ano coa obra Clepsidras. Ao remate celebrarase un ágape para as persoas que asistan.
O certame
O Premio de Poesía Eusebio Lorenzo Baleirón, que leva o nome (a xeito de homenaxe) do destacado poeta local, finado en 1986, autor de obras tan memorábeis como Os días olvidados e A morte presentida, constitúe cos seus 34 anos de vida un exemplo de resistencia literaria e reivindicación do talento das nosas escritoras e escritores, sendo máis meritoria a súa supervivencia nun contexto marcado pola pandemia de COVID e, tamén, pola falta de recursos económicos que adoita cebarse con este tipo de iniciativas.
O certame vén da man do Concello e da Deputación da Coruña.
Mini Premio
Amais de todo o devandito, o Concello de Dodro comunicou a concesión do Mini Premio Eusebio Lorenzo Baleirón: Concurso Literario a María Rodríguez Romero pola súa obra O mundo dos soños. Na acta o xurado salienta “a simbiose da linguaxe visual e o discurso literario que amosa o traballo, o dominio tanto do ritmo do relato como do uso dos silencios, o control da luz e as referencias ao espazo escénico de Dodro (Tarrío), a Rosalía de Castro e a súa obra e a Eusebio Lorenzo Baleirón e a súa obra”.
O Concello de Dodro agradeceu a participación da mocidade no marco deste certame e convida as mozas e mozos a seguir creando e expresándose de xeito artístico e literario na nosa lingua.
