O Concello de Ribeira vén de compartir os nomes dos nenos gañadores do Concurso Escolar de Debuxo e Pintura do Nadal, convocado novamente polo Goberno local para seleccionar as imaxes que darán corpo ao cartel oficial das festas e á postal institucional de felicitación. Finalmente resultaron gañadores do certame Ainara Piñeiro Pérez, de 8 anos de idade e estudante do CEIP de Frións, e Alejandro Vázquez Insua, de 5 anos e alumno do CEIP Heroínas de Sálvora de Aguiño.
As destacadas creacións dos pequenos foron presentadas este 9 de decembro pola concelleira de Cultura, María Sampedro, nun acto na que estivo acompañada de Ainara e Alejandro.
A edil ribeirense informou de que foron máis de 400 as creacións presentadas, agradecendo a boa disposición dos colexios para tomar parte no certame.
O xurado valorou tanto a cantidade como a diversidade das obras. Estivo composto por Eugenia Gómez da Galería O Faiado, o artista Fernando Yáñez, o técnico municipal Unai González e a concelleira de Educación Juana Brión, con Sara García como secretaria, con voz e sen voto.
Os rapaces recibiron tamén cadanseus premios de 150 euros distribuídos en un bono de 100 euros (para gastar no caso de Ainara en Milar Sampedro e no caso de Alejandro e Daga Sport) e outro de 50 euros a investir en ambos casos na Librería Mirás.
