Comeza a conta atrás para un dos grandes eventos deportivos da tempada: a décima Sin-Son 10K

A carreira Sin-Son 10K, un dos eventos deportivos máis relevantes da tempada en Galicia, celebra esta fin de semana a súa décima convocatoria en Porto do Son, organizada polo Concello. E concreto, disputarase os días 18 de decembro (escolares) e 19 (absolutas e absolutos).

Coma o ano pasado, incluirase no calendario oficial de probas da Federación Galega de Atletismo. A proba reunirá 2.000 atletas entre todas as categorías, segundo confirmou o concelleiro de Deportes Juan Pouso, quen destacou a importancia deportiva do evento (un referente absoluto do calendario galego) e tamén a súa relevancia económica (polo impulso que lle dá ao comercio e á hostalería local) e turístico-paisaxística (poñendo á nosa disposición un “percorrido inigualábel” que nos permite correr co mar sempre ao noso carón).

Por certo que a celebración do evento implicará o peche ao tráfico da AC-550 entre as 10.20 e as 12.15 horas do domingo.

Lembrar tamén que en oito días a carreira esgotou todas as súas prazas dispoñíbeis, o que fala as claras do interese que suscita.