A asociación inclusiva Amicos presentou na mañá deste 10 de decembro o seu Calendario Solidario 2022 na sede en Meaño (Pontevedra) das Adegas Paco e Lola. Ademais, a entidade da nosa comarca entregou a todos os asistentes un exemplar da dita publicación. O acto complementouse cuns petiscos por cortesía da adega. Dende Amicos agradeceron un ano máis a colaboración do histórico estudio fotográfico ribeirense Lesmes, que se implicou novamente na realización dun calendario onde as e os protagonistas volven ser as persoas integrantes da asociación.
Asistiron ao evento Paz Lago Martínez, concelleira de Educación e Cultura de Sanxenxo; Daniel Arosa Dasilva, concelleiro de Servizos Sociais, Deportes e Mocidade de Sanxenxo; Ramón Alfonso Piñeiro, concelleiro de Infraestruturas de Meaño e Constantino Cordal Rodríguez, primeiro tenente alcalde de Cambados. Todos coincidiron no importante labor que desenvolven asociacións como Amicos ao tempo que deixaron a porta aberta para futuras colaboracións.
Pola súa banda, Eladio Riveiro, vicepresidente de Paco e Lola, mostrou a súa satisfacción por ter acollido na dita adega un evento de tal relevancia como a presentación do calendario de Amicos: “Graciñas por elixirnos e agardamos que sigades contando connosco nas próximas edicións”, sinalou, ao tempo que agradeceu a presenza dos devanditos concelleiros e de Gadisa.
A continuación, Carmen Piñeiro e Begoña Pérez, representando a Amicos, presentaron xunto a Felisa Piñeiro, membro da xunta directiva da entidade, o Calendario Solidario 2022. Todas mostraron o seu agradecemento e confesaron estar “moi contentas de participar nas fotografías do calendario”. Felisa Piñeiro destacou tamén que se trata dunha “obra moi necesaria” e que grazas a iniciativas como estas “conseguimos chegar ao que somos agora e esperamos que para o ano sigamos así”.
Iria Rodríguez, representante da Corporación Gadisa, amosouse “encantada de colaborar” e deixou constancia da súa intención de seguir colaborando coa asociación, tanto nesta actividade como outras semellantes. “Seguiremos traballando en vías de colaboración conxunta”, dixo.
O proxecto está comprometido coa RSC de Paco e Lola, CONGALSA, Candelas, Servicio Móvil e Cabañitas del Bosque. Ademais, o calendario conta coa colaboración de máis de 20 provedores. Pódense obter a través das redes sociais onde ten presenza Amicos ou a través do correo hola@amicos.org.
