O Concello de Boiro, xunto coa asociación Comisión Parroquial de Santiago de Lampón, organizan un ano máis a tradicional Cabalgata de Reis, nesta ocasión adaptada ás restricións e medidas da COVID-19. A presentación da cabalgata realizouse na tarde deste 30 de decembro e nela participaron a concelleira de Cultura, María Outeiral; o concelleiro de Comercio, Marcos Fajardo; e o párroco de Lampón, Marcelino Sánchez.
Segundo indicaron, a cabalgata vai contar só con carrozas, o nacemento e as de cada un das Súas Maxestades, e en cada unha delas irán unicamente dúas persoas. Nesta ocasión non contará con máis comitiva nin participantes, pero si coa presenza dalgún grupo de musica. O percorrido sairá ás 17.00 horas de Lampón e chegará a Boiro pola rúa Principal e percorrerá a rúa peonil ata a praza da Boqueira de A Negral. Alí fará unha parada na carpa, para que de xeito controlado os nenos e nenas poidan recoller os seus caramelos.
De seguido, partirá de novo cara Escarabote, onde percorrerá a estrada xeral e chegará ao Centro Social para facer novamente parada e entregar caramelos.
“Malia a situación sanitaria non quixemos deixar aos nenos e nenas de Boiro sen esta cita tan especial, polo que pedimos moita responsabilidade para evitar as aglomeracións”, comentou a concelleira de Cultura, María Outeiral.
Tamén lembraron que hai máis de 50 anos que a Comisión Parroquial Santiago de Lampón organiza esta cabalgata de Reis, unha cita coa que colabora o Concello de Boiro e que “é unha das mais importantes para a veciñanza, sobre todo para os nenos e nenas do municipio”, explicaron.
