A mundialmente coñecida historia de O libro da selva, escrita en 1894 polo escritor inglés Rudyard Kipling e levada despois ao cinema por Walt Disney, segue viva e actual, engaiolando ás nenas e aos nenos que se achegan á historia do neno Mowgli e os seus amigos (e inimigos) no máis profundo e salvaxe da foresta hindú. A rapazada de Porto do Son e da nosa comarca terá este Nadal, o 22 de decembro, unha nova oportunidade para coñecer estes personaxes, cunha nova recreación (unha viraxe musical) de O libro da selva a cargo de Teatro Avento Producións.
Será no auditorio da Casa da Cultura de Porto do Son, a partir das 17.00 horas.
Trátase dun espectáculo ideal para público infantil e familiar (crianzas de máis de 6 anos). Organizan o Concello e máis a Deputación da Coruña, ao abeiro da súa Rede Cultural.
Argumento
Esta adaptación ao galego do texto orixinal de Rudyard Kipling revive as aventuras de Mowgli, un neno abandonado no máis profundo da selva na India. Adoptado polo oso Baloo e a pantera Bagheera acabará por chamar á perigosa selva fogar. Un fogar habitado por variedade de especies animais que, a pesar das diferencias, coñecen o significado do respecto ás diferencias, a tolerancia, e a camaradería…
