A Deputación da Coruña, en colaboración co Concello de Boiro, vai organizar esta semana unha xornada na que avaliar e mostrar os grandes desafíos do novo modelo cultural que nos deixou a pandemia, xuntando recursos para acadar, en última instancia, un sistema máis sustentábel social, ambiental e economicamente. Trátase da última xornada deste ano no marco do programa A Cultura é un Dereito, que organiza a área de Cultura da Deputación da Coruña co obxectivo de abrir un marco formal de reflexión ligado ao momento de crise aberto tras a aparición da pandemia e atendendo tanto ás necesidades detectadas no sector e como a novas demandas da sociedade.
Así, a xornada Cultura Sustentable, o reto postCOVID celebrarase o mércores 1 de decembro no Centro Social de Boiro e dará comenzo ás 16.00 horas da man do deputado de Cultura, Xurxo Couto, e do comisario da xornada e técnico cultural, Alberto García. Ambos abordarán a dimensión sustentábel da cultura “partindo da necesidade de reformular as formas de traballar” e tendo presente que a cultura, amais dun recurso económico, é un dereito cidadán”.
O primeiro bloque de intervencións centrarase na sustentabilidade ambiental e social, coa participación de María Baqueiro, experta en cultura mantíbel, rendíbel e respectuosa co medio en Galicia, e Joam Evans, integrante da comunidade de montes de Froxán. A conversa será moderada por Miguel Rial, do colectivo Fousas ao Monte. Seguiralle unha presentación de casos de proxectos sustentábeis, que se centrará no Laboratorio Ecosocial do Barbanza e no Festival Agrocuir, e será conducida por Fran Quiroga, coordinador do estudo de cultura e sustentabilidade do Consello da Cultura Galega.
O segundo bloque estará dedicado á sustentabilidade política, e será guiado pola poeta e activista Charo Lopes e contará coa participarán David Rodríguez, autor do blog O funambulista Coxo, e de representantes de Rexenerando Cooperativa (cooperativa sen ánimo de lucro fundada no 2014 en Ferrolterra, conformada por un equipo interdisciplinar que desenvolven proxectos de intervención sociocomunitaria para a xustiza social, co obxectivo de rexenerar as vidas e os vínculos colectivos).
O último bloque da tarde centrarase na sustentabilidade económica e versará sobre a precariedade no sector da cultural. Consistirá unha conversa sobre o Manual de supervivencia na cultura galega, na que participarán o xestor cultural especializado no ámbito dixital, Sergio Lago, a xestora cultural e xornalista María Yáñez e o técnico cultural Alberto Garcia. Entre os diferentes bloques e ao remate da xornada, intervirán AldaoLado (o dúo poético-activista formado por María Lado e Lucía Adao).
Todas as intervencións serán retransmitidas en streaming a través da canle de Youtube da área de Cultura da Deputación da Coruña e serán interpretadas en lingua de signos.
