Segunda vitoria consecutiva para un Rotogal Boiro Voleibol que exhibiu na cancha do Eivissa Ushuaïa a súa versión máis dominante. Os de Marcelo Chino Benavídez foron superiores a un adversario resignado a manterse a remolque dos galegos e que só puido plantar cara no tramo final do terceiro set. Con este triunfo, os da Cachada ascenden á sétima posición da Superliga á espera de recibir a semana que vén ao Leleman Valencia.
O Rotogal Boiro Voleibol expuxo un encontro moi serio e funcionou que dá xenio na cancha do Eivissa Ushuaïa. Os visitantes foron solventes nas rotacións e impuxeron a lei do seu bloqueo-defensa. Aos locais non quedou máis remedio que ceder a iniciativa no xogo e claudicar nos dous primeiros sets (21-25 e 20-25).
Todo parecía encarrilado na terceira manga para o Rotogal Boiro Voleibol. Con todo, o Eivissa Ushuaïa optou por arriscar no saque e, no tramo final do parcial, foi quen de recortar diferenzas (25-22). Todo foi un espellismo. Os visitantes volveron poñer o mono de traballo no cuarto set e sumaron tres puntos que lles proporcionan un novo empuxón na clasificación da Superliga.
Ibiza Ushuaïa, 1: Javier Sánchez, Mohamed En Nakhai, Luca Cuminetti, Iván Hurtado, Daniel Retuerto, Elvis de Oliveira e Víctor Sánchez (líbero). Tamén xogaron Arabisen Rodríguez e Camilo Corona.
Rotogal Boiro Voleibol, 3: Gaby del Carmen, Mario Iglesias,José Carlos Romero, Felipe Benavídez, Renan Levandoski, Gaspar Bitar y Adrián Alves (líbero). Tamén xogaron Ismael Martínez e Pablo Nieto.
Sets: 0-1 (21-25), 0-2 (20-25), 1-2 (25-22) y 1-3 (21-25).
Árbitros: Francisco Sabroso e José Luis Arrarte.
Incidencias: Partido disputado no Poliesportiu Sa Blanca Dona
