O turismo responsable e de calidade é unha materia pendente da nosa comarca, principalmente na zona delimitada polo parque natural das lagoas de Vixán (Carreira), Carregal (Artes) e dunas de Olveira (Corrubedo), a pesar de ser o máis visitado de Galicia, con máis de trescentas mil persoas ao ano.
Algúns cremos que chega o momento de poder xerar riqueza para o municipio de Ribeira e toda a Comarca do Barbanza en xeral, así como a necesaria xeración de emprego a través do desenvolvemento dunha serie de actividades dentro do parque. Faltan zonas de estacionamento e sobran terreos comunais e propiedades privadas para crealos; non hai casetas para a venda de camisetas, fotografías da contorna ou produtos típicos, para os visitantes, como o mel, o augardente, o viño, as patacas, etc… Poderían alugarse bicicletas para a época primaveral, con visitas guiadas polos camiños delimitados dentro do parque así como paseos a cabalo, sen esquecernos de poder gozar dunha escola de surf ou deportes náuticos, adecuados á contorna.
Cantidade de actividades que se poderían desenvolver, creando riqueza e emprego para a comarca. Despois de máis de varias décadas case todo segue igual. Chegan miles de visitantes e van deixar os seus aforros fóra do municipio, e todo por falta de vontade política. Xa está ben, os ribeirenses estamos orgullosos da nosa contorna natural pero cremos e queremos sacar algún “beneficio razoable” desta circunstancia, máxime coas elevadas taxas de paro que hai actualmente.
