O Noia busca cortar a mala racha

Despois dun gran inicio de competicións, onde o Noia se situou durante varias xornadas nos postos altos da clasificación, agora mesmo non atravesa a súa mellor racha. Os noieses levan desde o 12 de outubro sen saborear os tres puntos. A última vez que o fixeron foi contra o Alondras no Julio Mato por 2-1. Desde esa data contabiliza unha derrota fronte ao Somozas, un empate na casa contra o Arzúa e unha derrota fronte ao colista o Arnoia a semana pasada.
Este domingo recibe ao Silva coa necesidade de sumar tres puntos importantísimos que lles farían subir postos na clasificación. Os coruñeses atópanse na novena posición con 11 puntos, os mesmos que os noieses. Os de Iván Carril sairán a tentar que os tres puntos queden na casa ante un rival directo.
O encontro disputarase o domingo a partir das 17:00 horas no Julio Mato “Matito”. O partido corresponde á xornada 10 da Terceira Federación.