O Concello de Boiro, a través das áreas de Educación e Medio Ambiente, está a organizar unha serie de charlas nos centros de ensino do municipio. Este luns o IES A Cachada acolleu unha destas actividades, que consistiu en achegar ao alumnado coñecementos de valor sobre árbores autóctonas da nosa terra e cogomelos.
Participaron un total de 120 alumnos e alumnas de 1º da ESO, que aprendeu a importancia destas especies para a preservación da biodiversidade, as características do medio natural que fan posíbel o seu desenvolvemento e a identificar as especies máis comúns, ademais de curiosidades. O obxectivo destas charlas divulgativas é que, de maneira introdutoria, esperten no alumnado o interese na biodiversidade do municipio.
O IES A Cachada participa no programa Innova, dentro da liña Edusostibilidade da Consellería de Educación que busca promover o desenvolvemento sostible e fomentar a sensibilización, a concienciación e a educación de calidade. O Concello de Boiro colabora cos centros de ensino do municipio, mediante as áreas de Educación e Medio Ambiente, para formar ao alumnado en sostibilidade.
