O Concello de Ribeira deu continuidade este xoves 11 ao seu programa de xuntanzas cos distintas organizacións e entidades de carácter social. Na de hoxe participaron a concelleira Ana Barreiro Rego, e máis a presidenta da delegación en Ribeira de Cruz Vermella, Ángeles Cores. Na reunión a edil puido escoitar de primeira as inquedanzas e retos da organización a nivel local, comarcal e galego.
Barreiro lembrou que o Concello mantén dende hai moitos anos un convenio de colaboración co que axudar a que a entidade humanitaria alcance os seus fins sociais.
De resultas do encontro, no que tamén estivo a xefa de servizo Francisca Vidal, analizouse a posibilidade de explorar novas vías de cooperación que estiveran enfocadas principalmente á atención daquelas persoas persoas con signos de soidade crónica para favorecer a súa socialización.
A presidenta de Cruz Vermella en Ribeira e a concelleira de Servizos Sociais acordaron manter máis xuntanzas como a deste xoves para perfilar o traballo conxunto.
