O Concello de Boiro está a realizar a mellora da sinalización viaria en estradas do rural para avanzar en seguridade nas vías secundarias. En total estase a intervir nun total de 16 rúas do municipio.
Máis polo miúdo, os traballos consisten no pintado con marcas viarias divisorias dos dous carrís na contorna de diversos centros de ensino como son a zona de acceso ao CEIP Cespón, o acceso ao CEIP Escarabote, o acceso ao CEIP Santa María do Castro en Cabo de Cruz e o acceso ao IES Espiñeira.
Estase a traballar tamén nos lugares de Pouso e Brañón en Escarabote, no acceso á igrexa de Santa María do Castro, na alameda de Barraña, na estrada de Espiñeira, na aldea de Abanqueiro, na estrada da Boliña dende San á avenida da Constitución, na rúa Breiro e na estrada de acceso ao EVA10 en Moimenta. Ademais das marcas viarias e sinalización, estanse a delimitar zonas de estacionamento na rúa As Mangas e Curvera, en Cabo de Cruz, e na rúa Currillo.
Con estas actuacións en varias estradas secundarias do municipio, sinala o Concello, “o que se pretende é dar unha resposta aos problemas de circulación e estacionamento en diversos puntos á vez que se intensifica a seguridade viaria”.
