O BNG presenta emendas ao Orzamento da Xunta por valor de 5M€ para A Barbanza

O BNG presentou publicamente as emendas que rexistrarán aos Orzamentos da Xunta para o ano 2022 e que ascenden a un total de 5 millóns de euros. A deputada, Rosana Pérez, acompaña por membros do BNG comarcal, detallou que “é unha burla cualificar, unha vez máis, como históricos uns Orzamentos que non atenden as necesidades da Barbanza e onde se aplican recortes a servizos públicos como educación e sanidade”.

Pérez Fernández recoñeceu que “bota en falta maior investimento en educación, onde houbo un recorte brutal de profesorado e tamén en Sanidade onde a carencia de profesionais é evidente”,dixo. Ademais esixiu que se reabran de maneira inmediata os centros de saúde de Cabo de Cruz (Boiro) e Taragoña (Rianxo).

Rosana Pérez criticou “a ausencia de investimentos para A Pobra do Caramiñal e Boiro”. E engadiu: “Parece que Barbanza só ten dous concellos” asegurou. A deputada nacionalista deu conta “dunhas propostas de mellora baseadas nas necesidades e demandas máis urxentes e necesarias para as veciñas e veciños da Barbanza. Estas emendas son un exemplo de que cos mesmos cartos é posíbel facer unha política distinta, centrada nas necesidades actuais da veciñanza e atendendo as súas demandas, de cara á mellora económico-social dunha das comarcas máis dinámicas do país”, salientou.

Pérez Fernández detallou que “nos Orzamentos levan anos consignándose partidas como a da ampliación do Hospital da Barbanza”. Segundo dixo, “levan dous anos poñéndose 589.200 euros no papel pero nunca se executan”. Os nacionalistas esixen que se amplíe o hospital “dunha vez por todas, dotar a Ribeira dunha ambulancia medicalizada, ambas emendas por valor de 1 millón de euros”.

Os nacionalistas puxeron o foco no traballo despregado pola agrupación para “conseguir que Ribeira teña unha nova residencia pública de maiores” pero ante “o elevado déficit que existe” propoñen “unha partida de 1 millón de euros para crear outra en Boiro e 600.000 euros para adecuar o Pazo de Rianxiño como centro de día”.

As emendas presentadas polo BNG recollen unha demanda da veciñanza da comarca que “vén de antigo” e que segundo critican, “aínda non atopou acollida nos plans económicos e de mobilidade da Xunta: a conexión ferroviaria da Barbanza”. Os nacionalistas propoñen “elaborar un estudo, valorado en 100.000 euros, buscando poñer solución a unha necesidade que afecta a toda a sociedade barbancesa”.

Por último desde o BNG inciden en que “é preciso destinar 630.000 euros a rehabilitar a Biblioteca de Rianxo, investir 300.000 euros en mellorar o mantemento dos portos da comarca, destinar outros 150.000 a accións específicas de conservación e educación ambiental no Parque Natural de Corrubedo, así como achegar 1 millón de euros para a creación dunha nova depuradora en Boiro que permita preservar os sectores produtivos dos que vive, directa ou indirectamente, todo o municipio”.