O BNG pide á xunta que manteña os postos de traballo da Mancomunidade da Serra do Barbanza

Esta semana o grupo parlamentar do BNG, máis en concreto as deputadas Rosana Pérez, Iria Carreira e Luis Bará, presentaban unha proposta non de lei perante o Parlamento Galego na que solicitaban á Xunta a defensa dos postos de traballo xerados na planta de tratamento de residuos da Mancomunidade de Concellos Serra do Barbanza (en Servia, Lousame) e instaban a respaldar un proxecto que ten demostrado a súa sostibilidade.

Segundo indicaban, “os resultados obtidos na planta de Lousame son mellores que os da media galega, na que SOGAMA, xestiona preto do 90% do total de residuos de Galicia”.

Dende o BNG sinalan que o sistema SOGAMA incumpre “dunha maneira moito máis evidente e alarmante có modelo da Mancomunidade as obrigas da normativa estatal e comunitaria” e “que se verá afectado dun xeito moito máis importante pola entrada en vigor de impostos aos tratamentos finalistas, que son a razón de ser de SOGAMA (incineración e depósito en vertedoiro)”.

Por último, lembran dende o BNG que a Mancomunidade de Concellos Serra do Barbanza dá traballo a máis de 150 persoas (na súa maioría mulleres) e salientan o impacto negativo que suporía para a zona o peche do complexo medioambiental de Lousame.