O BNG de Ribeira esixe ao Concello que remate o edificio do Centro Social de Carreira

O BNG rexistrou iniciativas no Concello de Ribeira para esixir novamente a finalización do Centro Social de Carreira, co obxectivo de poñelo canto antes a disposición da veciñanza e do tecido asociativo. E explican: “É necesario rematalo para evitar que se sigan deteriorando unhas instalacións pagadas con fondos públicos e que posibilitarían que a veciñanza de Carreira dispoña dun espazo axeitado para poder desenvolver xuntanzas, actividades lúdicas e culturais”.

A respecto do devandito, a agrupación lembra que as obras iniciáronse no ano 2012 e explica que logo foron obxecto de “sucesivas paralizacións” até chegar a 2016, “ano no que se aproba unha partida de 266.377 euros para rematalo que nunca chegou a materializarse, ao igual que en 2019, cando se aproba destinar 295.580€ que tampouco se executa”. Así, engaden, chegamos a febreiro de 2021, intre no que se adxudica a obra de remate das instalacións interiores e exteriores por 260.000€ e un prazo de execución de oito meses. “A día de hoxe segue sen executarse dita partida do orzamento e continua deteriorándose o xa construído”, denuncian, criticando o que cualifican de “desleixo” por parte do Goberno local á hora de dotar a Carreira dun centro social que “dinamice a vida social da parroquia e responda ás necesidades da veciñanza e dos colectivos”. O voceiro nacionalista, Xosé Vázquez Cobas, opina que “eses 10 anos de atraso son o emblema dun goberno fracasado, centrado nas grandes obras e incapaz de atender as necesidades veciñais”.