Na Primeira Autonómica o Cidade de Ribeira tumbou ao Unión (2-1)

Era o partido cinco estrelas da xornada, e non decepciounou. O Cidade de Ribeira recibía a
un Unión líder, invicto, con 13 goles a favor e 0 en contra, pero os de Asados non puideron
continuar a súa xeira e caeron derrotados nun igualado derbi disputado na Fieiteira (2-1).
E iso que comezaron mellor os de Asados, ben plantados no seu campo cunha liña de cinco
defensas, tres centrocampistas e dous homes rápidos arriba. Os de Santa Uxía saíron
dubitativos, con medo a cometer un erro que lles complicara o encontro. Pero no minuto 15,
nunha acción a balón parado, Lijó non medía ben a saída e Oscar cabecea ao fondo da rede
para adiantar aos visitantes. Con este gol o plan de Luisito reforzábase.
E puido deixar sentenciado o encontro o Unión se non fose polos fallos de Nestor e Ismael e
polos acertos dun Lijó que se estaba reivindicando a medida que pasaban os minutos. Co
resultado de 0-1 chegaríase ao descanso.
Logo do paso polos vestiarios, o Cidade de Ribeira mellorou, meteulle unha marcha máis á
ciruclación de balón e comezou a ser moito máis incisivo, sobre todo con Joseíño e Abi.
No minuto 51, Abi aproveitaría un balón dentro da área para axustalo á esquina inferior da
portería defendida por Rial para igualar a contenda. E a partir desde momento só houbo un
equipo que se quixo levar os tres puntos, os locais. E grazas a ese ímpetu, Joseíño remataba
un centro na frontal da área pequena para poñer o 2-1 co que se desataba o xúbilo nas
bancadas da Fieiteira.
Nos minutos finais o Unión estivo a punto de empatar o encontro, pero foi imposible, e o
derbi quedouse en Ribeira.
Con este resultado, o Cidade de Ribeira reengánchase á loita polos postos de promoción e
sit´´uase sexto con 11 puntos, a 2 do líder, que segue sendo o Unión.
Doutra banda o Taragoña segue sen gañar, pero sacou un valioso puntos no seu
enfrontamento contra o Lalín, un dos equipos chamados a loitar polo ascenso. Non parecía
pintar ben a cousa cando ao cuarto de hora Casal anotaba o 0-1 e no 51 Eloy poñía o 0-2
para os de Lalín. Sen embargo, a entrada de Alberto Laíño no 66 cambiaría o encontro. En
apenas dous minutos o dianteiro rianxeiro anotaba dous goles que poñían o definitivo 2-2.
Con este resultado o Taragoña mantense na parte baixa da táboa con 3 puntos.
No grupo da Costa o volantes de Baño venceu por 4-3 ao Ponteceso. Pesco cun hat trick foi
o home encargado de darlle a segunda vitoria aos de Muros nun encontro que tiveron
controlado a meirande parte dos minutos. Con esta vitoria o Volantes ascende uns postos na
clasificación e ponse con 6 puntos.