Boiro acollerá unha xornada con exemplos prácticos (e viábeis) de sustentabilidade económica, cultural e política

O Concello de Boiro vai acoller o vindeiro día 1 de decembro unha actividade directamente encamiñada a cambiar os nosos xeitos de producir e consumir, no camiño que facelos máis acordes coa protección do medio ambiente e do futuro da humanidade. A xornada Cultura sustentábel, o reto posCOVID vén da man da área de cultura da Deputación da Coruña e do xestor cultural e técnico de Cultura do Concello, Alberto García. Vaise realizar no Centro Social de Boiro.

O programa da xornada contempla mesas de debate que buscan incidir na viabilidade dunha cultura economicamente sustentábel e que aplique criterios de distribución baseados na equidade.

A presentación da xornada será ás 16.00 horas e a primeira das mesas de debate, Sustentabilidade ambiental vs. Greenwashing, comezará ás 16.20 horas e nela van participar María Baqueiro e Joam Evans e estará conducida por Miguel Rial.

Ás 17.10 horas Fran Quiroga fará unha presentación de proxectos sustentábeis cos casos concretos do Laboratorio Ecosocial do Barbanza e o Festival Agrocuir.

Ás 18.00 vaise levar a cabo a mesa redonda Sustentabilidade Política. Os valores que traslada a cultura, conducida por Charo Lopes na que van participar Rexenerando Cooperativa e David Rodríguez.

Ás 19.00 comeza a conversa Sustentabilidade económica. A precariedade no sector da cultura na que van intervir Sergio lago, María Yáñez e Alberto de Boiro sobre o manual de supervivencia na cultura galega. Os descansos da xornada estarán amenizados polo grupo poético AldaoLado.

Esta xornada, enmarcada na liña A cultura é un dereito da área de cultura da Deputación da Coruña insiste na idea de “outra cultura é posíbel”. O obxectivo é chegar a unha reflexión sobre as formas de traballar en cultura a partir de agora e tendo en conta o momento que vivimos.

A asistencia é gratuíta e a capacidade está limitada. As inscricións deben realizarse a través do formulario habilitado na páxina web www.aculturaeundereito.gal. As inscricións están xa abertas dende este luns, e poden realizarse ata as 14.00 horas do 29 de novembro.