O Concello de Boiro está a levar a cabo tarefas de humanización e mellora da praza de Galicia para o seu acondicionamento e para permitir o máximo desfrute por parte da veciñanza de todas as idades. As tarefas compleméntanse coas obras para a instalación da cuberta con iluminación solar fotovoltaica que se está a realizar con cargo ao POS da Deputación da Coruña. O alcalde, José Ramón Romero, e o concelleiro de Urbanismo e Obras, Luis Ruiz, visitaron este 10 de novembro as obras.
As tarefas de humanización que se contemplan consisten no acondicionamento do xardín frontal e os laterais que bordean a praza do Concello, así como na dotación de bancos e mobiliario público que “convertan o espazo nunha zona de ocio con todas as comodidades”, sinalaron o rexedor e o edil, engadindo que tamén se contempla o pintado dos muros laterais e a mellora da iluminación en toda a praza.
Asemade, realizarase unha renovación integral do acceso ao aparcamento municipal dende a praza, que está baixo a cuberta, e no que se atopan os baños públicos que poderán volver abrir ao público. “Con este acceso os pais podemos levar aos nenos e nenas dende o aparcamento directamente ao parque sen saír ao exterior, sobre todo no inverno”, afirmou o alcalde, facendo saber que o obxectivo de todos estes traballos é “xerar na céntrica praza de Galicia un espazo de ocio para os nenos e nenas que fan uso do parque infantil e tamén as nais e pais que os acompañan”
Romero e Ruiz engadiron que as actuacións para a instalación da cuberta do parque infantil “avanzan a bo ritmo”. Así, unha vez instalada a estrutura de madeira que forma a pérgola e colocado o revestimento da cuberta e as placas solares que a dotan de enerxía, estase a facer a instalación eléctrica para a iluminación LED do parque.
