A Policía Nacional detén en Ribeira a un home por un delito de roubo con violencia cometido nun bar de Palmeira

Axentes da Policía Nacional adscritos á Comisaría de Ribeira, en colaboración coa Policía Local, procederon á detención dun home de 46 anos de idade, veciño de Ribeira, como presunto autor dun delito de roubo con violencia. Segundo relatan, os feitos tiveron lugar o venres 19 pola tarde, cando o propietario dun bar próximo ao porto de Palmeira, ao proceder á súa apertura, atopouse con todo o establecemento revolto e sorprendeu a un individuo no seu interior.

As axentes relatan que ao ser sorprendido, o individuo tentou fuxir, polo que arremeteu contra o propietario do bar, golpeándoo na cabeza cunha pata de cabra, causándolle diversas feridas. Nese momento accedeu un empregado do local e entre el e o propietario lograron reducir ao individuo, comunicando os feitos á Policía, quen se desprazaron ao lugar e procederon á súa detención. Os axentes sinalaron que no momento da súa detención, o detido portaba diñeiro en efectivo en moedas de diverso valor subtraídas da caixa rexistradora e da máquina de tabaco, que foi forzada, así como máis de 30 paquetes de tabaco, dúas patas de cabra e unha navalla.

O detido accedeu ao local tras escalar un muro e fracturar unha xanela do mesmo.

Ao detido cónstanlle numerosos antecedentes policiais por delitos similares e por outro tipo de delitos.

Tras tramitarse as correspondentes dilixencias policiais, o detido é posto a disposición do Xulgado de Instrución nº2 de Ribeira, en funcións de garda.