A Asociación de Empresarios de Ribeira emitiu un comunicado relativo ás vindeiras celebracións do Nadal e á necesidade de garantir o desenvolvemento seguro das mesmas no concello. A patronal fai saber que “nas continuas reunións que temos co Concello chegamos á conclusión que a ambas as partes preocúpanos o que poida acontecer nestas próximas festas e é por iso que queremos facer patente nosa preocupación e a do Concello, polas concentracións que o Nadal poida propiciar”. Por esta razón, a asociación fai un chamamento ao sector da hostalería e a restauración acerca da observación e o cumprimento das medidas anti-COVID.
E engaden no comunicado: “Asistimos con preocupación ao repunte dos casos de contaxio e é por iso que pedimos aos profesionais dos sectores afectados que respecten e fagan respectar as medidas hixiénico-sanitarias, así como que respecten estritamente os horarios de peche en función do que a licenza de que dispón cada un dos locais lles permita”.
Na información achegada, a patronal ribeirense pide ao Concello que “tome as disposicións necesarias para coas forzas da orde, para facer cumprir os horarios, porque agora máis que nunca é imprescindible. Nunca mellor que nesta ocasión o dicir, teñamos a festa en paz, gozar do Nadal con orde e evitaremos volver a situacións anteriores que ninguén desexa”.
