A ABE lanza unha nova edición da campaña #RegalaBoiro

A Asociación Boirense de Empresarios quere manter os Bonos Regalo ABE activos durante todo o ano (a disposición dos clientes do concello para que poidan usalos para facer agasallos “a quen queiran e cando queiran”), polo que vén de lanzar unha nova edición da campaña #RegalaBoiro. Trátase dunha nova iniciativa publicitaria de Nadal a través da cal a ABE ofrece ás empresas que empreguen os Bonos Regalo ABE para o tradicional aguinaldo que se entrega ás empregadas e empregados. “Neste intre”, explican de a patronal boirense, “froito do traballo realizado, xa contamos con varias empresas que van a utilizar os nosos bonos para regalar aos seus traballadores, ou para complementar as tradicionais cestas de nadal”.

Segundo explica a entidade empresarial boirense, os bonos son “a mellor solución para agasallar” polas seguintes razóns:

-“Porque están adaptados aos gustos e necesidades de cada persoa xa que se poden utilizar en calquera dos preto de 200 socios e socias da ABE, que poñen ao alcance da cidadanía un amplo abano de produtos e servizos: alimentación, moda, calzado ou complementos ata viaxes, masaxes, clínicas dentais ou podólogas, seguros, gasolina, servizos hostaleiros e gastronómicos, material de construción, fogar, ferretería, electrodomésticos, etc”.

-“O seu consumo é local, repercute nas propias empresas de Boiro, nos nosos veciños e veciñas”.

-“Amosamos unha imaxe de unidade do tecido empresarial de Boiro e aportan a ABE unha presencia moderna e adaptada aos novos tempos”.

Como funcionan

Os bonos son unha caixa personalizada que dentro inclúe vales de compra de 5€ e un listado de todos os socios da ABE onde se poden gastar. Na caixa tamén vai un código QR co que se pode descargar ou consultar o listado no móbil, tableta ou PC. O cliente/empresa pode elixir de que cantidade merca o bono, sempre en múltiplos de 5 euros. As empresas tamén poden adquirir os bonos sen a caixa para complementar a súa cesta de Nadal ou mesmo se lles pode ofrecer a posibilidade de personalizar a súa caixa coa imaxe corporativa da empresa. Cando se recibe o regalo só hai que empregar os vales “coma se foran billetes en calquera dos preto de 200 socios e socias que xa veñen indicados no listado da caixa”. Amais, os vales non teñen caducidade.