Xosé Ricardo Losada presenta en Rianxo o 16 de outubro a súa nova novela, O rosario e a buguina

O sábado 16 de outubro, ás 13.00 horas, celebrarase no teatro do Auditorio de Rianxo a presentación dunha das máis agardadas novidades do panorama literario galego: a nova novela do escritor e profesor local Xosé Ricardo Losada, O rosario e a buguina, que chega ás librarías logo do incontestábel éxito de público e crítica de A casa xunto ao volcán (Galaxia). O rosario e a buguina, Premio Torrente Ballester 2020 da Deputación da Coruña, volve poñer o foco na terra natal do escritor. Así, se en A casa xunto ao volcán centrábase en narrar as andainas filosóficas dunha moza adolescente que recala no instituto de Rianxo, acompañando a súa chegada dunhas lecturas que deixarán fonda pegada e que marcarán a súa vida presente e futura, agora Losada decidiu poñer o foco na figura do poeta Manuel Antonio, construíndo unha biografía ficcionada que recrea os últimos meses do autor de De catro a catro.

O escritor rianxeiro Ricardo Losada nunha imaxe de Eduardo Castro Bal

No acto de presentación contarase coa presenza de Xosé Manuel Lobato (escritor), Malores Villanueva (editora), Antón Riveiro Coello (escritor e vogal de Barbantia), Xurxo Couto (deputado de cultura da Deputación da Coruña), Adolfo Muíños (alcalde de Rianxo) e o propio autor. A entrada só poderá adquirirse con reserva previa a través da web municipal, ata as 14.00 horas do xoves 14 de outubro.

Disidencia relixiosa

A obra, que en parte céntrase nos tirapuxas nos que se viu mergullado o poeta Manuel Antonio, a nivel familiar, pola súa disidencia relixiosa, encádrase temporal e xeograficamente en Rianxo e trala volta do escritor-mariñeiro á súa vila logo dunha estadía en Cádiz. Manuel Antonio, gravemente enfermo, negouse en rotundo a aceptar os ritos cristiáns nos seus últimos días de vida.

A novela valeulle a Losada o XXXII Premio Torrente Ballester de narrativa en lingua galega que concede a Deputación da Coruña. Foi a novela escollida polos gañadores da edición anterior, Álex Alonso e Antón Riveiro Coello; a xornalista Susana Pedreira; as escritoras Inma Otero e Beatriz Maceda e o deputado de Cultura da Deputación da Coruña, Xurxo Couto (presidente), así como a xefa de servizo de Cultura, Mercedes Fernández Albalat (secretaria). O xurado salientou “a potencia da historia que narra os últimos meses da vida de Manuel Antonio e o conflito suscitado coa súa nai na casa de Rianxo por motivos relixiosos e, de maneira especial, polo modo de se enfrontar á morte próxima”.

O autor é profesor de Filosofía no IES Félix Muriel de Rianxo e publicou cinco libros, O xene da chuvia (Edicións do Castro), Faustino Rey Romero. Un evanxeo bufo (Xerais Edicións) Bótame deste mar fóra (Toxosoutos), Manuel Antonio. Vida e misterio dun poeta galego (Editorial Galaxia) e A casa xunto ao volcán (Editorial Galaxia), galardoada co II Premio Viadutos 2019.