Veciños das Saíñas e BNG solicitan o arranxo do acceso a varias casas

13 Outubro 2021

Veciños e veciñas das Saíñas, na parroquia de Palmeira, puxéronse en contacto co Bloque Nacionalista Galego para trasladarlle os seus problemas de accesibilidade. En concreto, sinala o BNG, “compartiron con nós o prexuízo que padecen cada vez que entran e saen da casa por mor do mal estado no que se atopa o camiño de acceso ás súas vivendas”.

Segundo reflicte o BNG, o acceso a varias casas nas Saíñas “atópase en moi malas condicións cun pavimento disgregado e cunhas fochancas que provocan que o firme sexa esvaradío e perigoso para o tránsito de vehículos”. En palabras do voceiro do BNG, Xosé Vázquez Cobas, “se o Goberno local tivese unha boa planificación dos recursos e das obras, este camiño estaría arranxado, pero as prioridades do PP son concentrar os recursos no centro urbano”. Vázquez denunciou que “cando chove o camiño enlámase e a auga discorre por el ao non existir sistema de drenaxe nin canalización, situación que dificulta o transito das persoas que acceden ás súas vivendas”.

Desde o BNG consideran que “o Concello de Ribeira debería atender estas pequenas cuestións que supoñen un tema moi importante para as persoas que alí viven”. E engaden: “Xa expuxemos máis dunha vez, o Goberno local debería resolver estas pequenas cuestións que non requiren grandes investimentos pero contribúen a mellorar a calidade de vida da veciñanza” asegurou Cobas.

Outros artigos

Publicidade

Revista en papel

Opinión

“O mar de Foz”. Xulio Xiz

“O mar de Foz”. Xulio Xiz

Para os de terra adentro, a Mariña é territorio especial, de ostensible fervenza industrial e comercial e unha ledicia festeira na que ata as voces dos coros teñen harmónicos de mar. Fun o sábado a Foz, presentar dous libros de historia que honran a súa rica...