Un Noia inferior caeu en Somozas (2-0)

P.P.- Un mal comezo de encontro condenou ao Noia na súa visita a Somozas. Os noieses mostraron a súa peor cara no que vai de liga e pagárono na primeira metade onde xa perdían 2-0.

Costoulles entrar ao encontro aos de Iván carril, que parecían un equipo totalmente diferente aos das primeiras xornadas. A visita ao Manuel Candocia é unha das máis complicadas da Terceira Galega, e iso quedou demostrado desde ben cedo. Á media hora de xogo chegou o primeira tanto do encontro para os locais por mediación de Cañizares tras un pase de Marcos Álvarez. A partir dese momento o Somozas comezou a crear perigo e achegarse con maior insistencia aos dominios de Nahuel, que debutaba na portería noiesa. E cando parecía que o marcador non se ía a mover antes do descanso, Cañizares sentenciaba o partido.

Logo do paso polos vestiarios o Noia mellorou, e comezou a apertar máis obrigado polo resultado, e aínda que xeraron máis ocasións que na primeira metade, foron incapaces de reducir distancias nun marcador que acabaría 2-0 a favor do Somozas.

Con esta derrota, o Noia ocupa actualmente a sétima posición na táboa clasificatoria, empatados co sexto, quinto e cuarto clasificado. A vindeira xornada recibirán ao Arzúa no Julio Mato.