Remataron os novos traballos para acondicionar e protexer o Castro de Baroña

O Castro de Baroña vén de ser obxecto dunha serie de traballos de mantemento, limpeza e conservación. O resultado destas tarefas foi supervisado o pasado venres 15 de outubro polo alcalde Luis Oujo e máis a concelleira de Facenda, María Maneiro, acompañados de Luis Francisco López, co-director das actuacións levadas a cabo, que se centraron sobre todo en limpar e consolidar os diferentes elementos do xacemento, amais de arranxar as desfeitas (estruturais e medioambientais principalmente) ocasionadas polo importante fluxo de turistas que visita anualmente este importante enclave arqueolóxico.

A visita deste venres 15 ao Castro de Baroña nunha imaxe de El Correo Gallego

Tamén se traballou para recuperar e protexer aquelas partes que máis sofren o embate do mar e dos temporais. Todos coincidiron na necesidade de proseguir cos traballos de conservación do castro e facer todo o posíbel para seguir protexéndoo dos estragos producidos polos elementos naturais e, tamén, pola parte máis incívica do factor turístico. De feito, o Concello recoñeceu que xa traballa na procura de fondos para levar a cabo novos traballos, destinados non só á conservación, senón a seguir sacando á luz os tesouros que aínda agocha o xacemento, que, segundo sinalaron, calcúlanse que son moitos e variados (novas vivendas, escaleiras ou peches que fican aínda soterradas).