Os socialistas de Ribeira, por medio do seu concelleiro-voceiro José Manuel Vilas, presentaron un rogo para ser debatido en pleno relativo ao alumeado da praza da Lonxa de Ribeira, concretamente na rúa situada entre o Mercado Municipal e a entidade bancaria localizada neste punto da fachada marítima.
Nesta contorna, indican, as luminarias instaladas no pavimento (focos redondos) deixaron de funcionar hai xa certo tempo, achegando un problema de transitabilidade e accesibilidade que se agrava coa chegada dos meses de inverno, con noites máis longas e cunha escuridade “que se fai máis notoria nos portais de acceso aos edificios das vivendas”, indican.
A agrupación pide no rogo que por parte do grupo de Goberno se proceda a repoñer o alumeado axeitado no rueiro da praza de Lonxa, entre o Mercado Municipal e o inmóbel número 1 que está situado en fronte.
