A Asociación de Empresarios de Ribeira fixo pública unha campaña para apoiar ás persoas e ás empresas damnificadas pola erupción do volcán da Palma, que comezou hai máis dun mes provocando innumerábeis perdas materiais para a veciñanza e o tecido económico da illa, especialmente nas localidades máis próximas ás coadas de lava.
A campaña porá o foco nun dos principais activos económicos de La Palma, que dá sustento directo e indirecto a milleiros de fogares: os plátanos. Deste xeito, farase o preciso para que estes produtos sexan repartidos dende os diferentes establecementos da asociación. Mediante esta iniciativa, cada persoa que o desexe poderá levar dos locais os plátanos que considere oportunos, previo depósito de 1 euro de cota mínima por banana, quedando á súa vontade a cantidade a maiores que queira depositar nas urnas que para tal e efecto serán colocadas nos establecementos participantes.
Dita campaña materializarase en colaboración con Cáritas.
A asociación, na presentación da mesma, aproveitou para facer un chamamento á cidadanía de Ribeira a prol de conseguir a máxima participación e repercusión: “É o momento de arrimar o ombreiro e poñer o noso gran de area e contamos para iso coa colaboración das froiterías pertencentes á nosa asociación que serán as encargadas da subministración e reposición dos plátanos aos establecementos participantes”.
E engade a patronal: “Animámosvos a todos a participar xa que se trata dunha causa de necesidade e mediante esta campaña esperamos poder paliar algo, moi pouco sen dúbida dado o enorme dano causado, e que a nosa cidade dea mostra unha vez máis desa entrega que tan demostrada ten noutras moitas accións a favor dos necesitados”.
