Os areais de Barraña, Gafa, Portosín, Aguieira, Tal, Serres e Louro, incluídos na nova Limpeza Simultánea de Praias

A asociación ecoloxista ADEGA convocou un ano máis a Limpeza Simultánea de Praias, unha xornada de voluntariado ambiental que ten como propósito “concienciar á sociedade na loita contra a contaminación mariña”. Esta X edición celebrarase os vindeiros 15 e 16 de outubro nos areais galegos. Na listaxe están incluídos varios da nosa comarca: a praia de Barraña (Boiro) e as de Gafa e Portosín (Porto do Son). No primeiro caso encargarase da limpeza o voluntariado do CEIP Santa Baia e no segundo o CEIP de Portosín. Tamén se inclúen as praias de Tal e Serres, en Muros, cuxa limpeza será cometido do IES As Insuas, e o areal de Louro, que será liberado de refugallos polo Concello e máis ADEGA. O voluntariado de ADEGA Compostela encargarase de actuar na praia de Aguieira, tamén en Porto do Son.

Alta (e variada) participación

Foron chamados a participar na limpeza de praias e denunciar esta problemática ambiental os centros de ensino, escolas de surf, centros de mergullo, clubs de piragüismo e vela, pescadores, mariscadoras, concellos, e entidades de todo tipo, tanto públicas como privadas, ademais das persoas particulares.

O obxectivo das limpezas de praias é “o de eliminar parte dos residuos que están nas praias como símbolo de chamada de atención sobre esta a situación de contaminación que sofren as nosas praias e areais”. Segundo ADEGA, as principais causas desta problemática ambiental débense situar no modelo de consumo e produción baseado no modelo “usar e tirar”, a deficiente xestión dos residuos que xeramos e a falta de concienciación dalgúns sectores da poboación. “Todo iso fai que cada ano 10 millóns de toneladas de lixo rematen nos océanos, procedente en parte da industria do mar (pesca, extraccións…), pero tamén dos nosos fogares”, explica a asociación.

Na edición do ano pasado da Limpeza Simultánea de Praias retiráronse do litoral galego preto de 3 toneladas de residuos, principalmente microplásticos, cabichas e pauciños de limpar as orellas, e participaron máis de 600 persoas. Para máis información: 628.378.804.