Logo da vitoria ante o San Sadurniño na fortaleza da Cachada por 3-0, o Rotogal Boiro Voleibol afronta este sábado ás 19.30 horas, no Pavillón Moisés Ruiz, a que o club considera “unha das saídas máis complicadas da tempada”. Os de MarceloChino Benavídez visitan ao Unicaja Almería, aspirante a destronar ao Guaguas e que a semana pasada impúxose na difícil cancha do Melilla por 2-3.
O Rotogal Boiro Voleibol contará, en principio, con todos os seus efectivos para medirse co Unicaja
Almería. E, tamén, cunha semana máis de rodaxe, algo que, segundo expresou durante a semana o propio adestrador Benavídez, outorga un salto de calidade ao equipo da Cachada.
O Unicaja Almería foi un dos grandes animadores do mercado o pasado verán. Reforzou o persoal con Pavel Kukartsev, oposto que foi designado MVP da tempada 2020-2021 na Superliga. Ademais, apontoou o equipo co central Jorge Fernández ou co experimentado colocador serbio Igor Jovanovic. Mesturados con internacionais como Juan Manuel González ou Miguel Ángel Fornés, os andaluces aspiran a todo no curso 2021-2022.
