O Rotogal Boiro Voleibol afronta a quinta xornada da Superliga co persoal ao completo. Nesta ocasión, o rival será o Conectabalear Manacor (o sábado ao seis da tarde na pista dos baleares), un equipo que gozou do liderado na competición e que a pasada finde sufriu a primeira derrota do curso fronte ao Melilla (3-0).
O Rotogal Boiro Voleibol, pola súa banda, comparecerá na cancha do Manacor despois de medirse a Guaguas, Almería e Teruel, os máximos favoritos da competición. Neste sentido, o técnico Marcelo Benavídez explica que “xogar contra o tres equipos máis importantes, sobre o papel, dános agora a posibilidade de buscar mellores resultados e ir de abaixo cara arriba; veremos como avanza o torneo”.
Trala disputa das catro primeiras xornadas, os da Cachada ocupan a oitava posición con catro puntos (cinco menos que o rival de pasadomañá). Sobre o Manacor, o adestrador do Rotogal Boiro Voleibol sinala que “é un rival con experiencia na Superliga, con xogadores que levan moito tempo xuntos, pero creo que estamos á altura para facer un gran partido”.
Segundo aclara Benavídez, unha das materias pendentes do Rotogal Boiro Voleibol é alcanzar unha liña de regularidade durante os partidos, tentando mellorar o arrinque nos mesmos: “Pasounos, sobre todo, contra Almería e Guaguas, dous partidos nos que non tivemos o noso mellor rendemento nos primeiros sets, pero, a partir do terceiro, fomos xogando mellor. Iso non nos sucedeu contra San Sadurniño, xa que aquel día empezamos ben e terminamos xogando mal o terceiro set. Pero eu creo que isto vai da man do adestramento e de que nos vaiamos coñecendo todos individualmente como equipo”, comenta o adestrador.
