Este 27 de outubro presentouse novo material radiocirúrxico no Hospital do Barbanza. No acto participaron o delegado da Xunta na Coruña, Gonzalo Trenor, a xerente da área sanitaria de Santiago e Barbanza, Eloína Núñez, e o alcalde de Ribeira, Manuel Ruiz, entre outros representantes autonómicos e municipais. Segundo fixeron saber, o novo equipamento incorporado ao complexo sanitario da nosa comarca tivo un custe superior aos 90.000 € e permitirá renovar os elementos existentes no bloque cirúrxico para “o seguimento e control en intervencións de cirurxía xeral, ortopedia, traumatoloxía, uroloxía, etc”.
Amais, engadiron que o aparello adquirido dispón de tecnoloxía que mellora a calidade da imaxe, e a capacidade de integración da imaxe e das doses impartidas. “Este novo equipamento achega á sanidade pública galega as últimas ferramentas de diagnóstico e tratamento coas doses máis baixas, o que supón unha mellora dos procedementos cirúrxicos cunha maior seguridade para os pacientes”, explicaron.
O representante do Goberno autonómico tamén informou que o noso hospital contará en breve cun novo ecógrafo para o servizo de radiodiagnóstico que ten un custe aproximado de máis de 116.000 euros. “O obxectivo deste novo equipo será dar unha correcta cobertura sanitaria á poboación, xa que a necesidade de realización de estudos ecográficos óptimos e de precisión nas distintas patoloxías ten un papel importante no seu prognóstico e seguimento”, dixo.
