O Festival de Cinema Inclusivo de Vigo incorpora a proxección da “Illa das mentiras” nunha sesión dedicada á igualdade

O Festival de Cinema Inclusivo de Vigo non deixa de crecer e nesta sexta edición, que terá lugar do 12 ao 16 deste mes, proxectará 54 pezas audiovisuais en tres recintos diferentes: o Auditorio do Concello, os Cinemas Salesianos e o Museo MARCO. Ademais, o evento cinematográfico incorpora tres novas sesións dedicadas á igualdade, á discapacidade e ao público familiar. Todas as proxeccións son de acceso libre ata completar aforo.

Tamén estará no festival a directora Paula Cons, presentando a película ‘A Illa das mentiras’ o venres 15 ás 21.00 h. nos cinemas Salesianos. A ficción narra a historia de tres mulleres que ante o naufraxio dun buque fronte a Illa de Sálvora, deciden botarse ao mar e conseguen salvar a vida de naúfragos.

O festival incorpora unha sesión de curtametraxes sobre igualdade. Esta sesión terá lugar o sábado 16 no Auditorio do Concello ás 11 da mañá e proxectaranse oito traballos audiovisuais: ‘A voz humana’ de Pedro Almodóvar, ‘Mamá non traballa’ de María Barragán, ‘Monólogo’ de Pilar García Elixido, ‘ Before I die’ de Iker Esteibarlanda, ‘ Cigarros’ de Rosario Pardo, ‘ Dolapo is dead’ de Ethosheia Hylton, ‘ The last day of patriachy’ de Olmo Omerzu e ‘A colcha e a nai’ de David Pérez Sañudo.
Despois das proxeccións terá lugar a charla AGAG sobre ‘Mujeres reais ficticias: o xénero na nova ficción’, na que participan os guionistas Anxo Manzano e Lida Fraga.