Rianxo será sen dúbida unha das capitais galegas da música este outono, a través da cuarta edición do Ciclo de Novos Intérpretes organizado polo Concello e a Escola de Música local. O certame comeza o vindeiro sábado 23 de outubro, ás 20.30 horas no Auditorio, co concerto a cargo de Óscar Vázquez ao trombón baixo e Yamini Teresa ao piano. A entrada, como nos demais concertos previstos no ciclo, será de balde e deberá reservarse na web municipal, na sección de reservas (neste caso da primeira actuación, até as 14.00 horas do 21 de outubro).
A seguinte cita será o 29 do mesmo mes, da man do rianxeiro Bernal Muíños, que virá acompañado do seu cuarteto de jazz. O concerto terá lugar na sala Arcos Moldes do Concello de Rianxo o vindeiro venres 29 de outubro ás 20.30 horas.
Xa metidos en novembro, o día 12 será a quenda do Víctor Bouzas Quarteto (trompeta), tamén ás 20.30 horas na Sala Arcos Moldes do Auditorio, ao que seguirá o concerto de Alba Franco (arpa) o 26 de novembro, no Auditorio. O ciclo remata con Lucía Mata (fagot) e Diego Mata (piano) o día 10 de decembro, igualmente no Auditorio de Rianxo ás 20.30 horas. En todos os casos cómpre facer as reservas de entrada (gratuíta) na web municipal.
