O Concello de Ribeira e ACOUGO celebran unha charla sobre cultura de acollemento

O vindeiro 16 de novembro vaise celebrar en Ribeira a charla Contigo florece, xerando cultura de acollemento. A actividade, abeirada ao convenio de colaboración entre o Concello e a Asociación Galega de Familias de Acollida, ACOUGO, ten o obxectivo de “dar formación e difusión sobre o sistema de protección de menores e concretamente, das familias de acollida”, polo que se lanza un convite a veciñanza do concello a asistir para informarse sobre esta medida. Amais, a charla quere achegar á sociedade ribeirense a realidade na que viven as nenas, os nenos e os adolescentes en situación de desprotección.

O coloquio está aberto a toda a cidadanía en xeral e transcorrerá no Centro Cultural Lustres Rivas as 18:00 do martes 16 de novembro.

Seguiranse as medidas establecidas por mor da COVID-19, polo cal resulta preciso anotarse previamente a través do teléfono de contacto da asociación 622 672 188, enviando un correo a info@acougo.gal ou cumprimentando o formulario de inscrición.