O Concello de Boiro ultima o acondicionamento dos cemiterios para a ponte de defuntos

O Concello de Boiro procedeu estes días a acondicionar os cemiterios municipais con vistas ás celebracións desta fin de semana, focalizadas no 1 de novembro, Día de Todos Os Santos. Segundo informou o Goberno local, nas últimas semanas realizouse unha posta a punto do Cemiterio Municipal de Boiro e nos demais camposantos do termo municipal. O concelleiro Marcos Fajardo visitou esta semana o espazo para supervisar os traballos que se están a realizar.

“Dende que entramos no goberno recuperamos a figura dun operario dedicado en exclusiva ao mantemento e conservación do cemiterio, para poder facer as tarefas diarias que require o espazo para o seu coidado”, afirmou o edil Fajardo, sinalando que este operario ocupase da limpeza, o acondicionamento dos xardíns e os arranxos puntuais no equipamento da instalación.