O Concello de Boiro anunciou este 27 de outubro que vai executar obras na avenida de Barraña para mellorar a mobilidade no centro urbano. En concreto, renovaranse as beirarrúas e servizos da dita vía, unha actuación dun orzamento de 132.772,37 euros que se vai executar con cargo ao Plan de Obras e Servizos (POS+ 2021) da Deputación da Coruña. O alcalde, José Ramón Romero, e o concelleiro de Urbanismo e Obras, Luis Ruiz, visitaron o lugar no que se van executar os traballos.
En concreto, o proxecto ten como finalidade “mellorar as condicións de seguridade viaria, favorecer a mobilidade alternativa cun tramo de carril bici e renovar os servizos de recollida de pluviais e iluminación viaria”. O proxecto contempla a execución dunha glorieta na intersección da avenida da Constitución coa avenida de Barraña para mellorar as manobras de xiro destas dúas vías principais.
Romero e Ruiz lembraron que a área de mobilidade está a realizar estes días un estudo de proba sobre a distribución dos carrís de acceso á nova glorieta que está proxectada dende da Constitución, onde se vai eliminar un dos carrís para habilitar arredor dunha vintena de prazas de estacionamento e mellorar a fluidez do tráfico na intersección e realizar unha simulación da futura glorieta antes do inicio de execución das obras.
O proxecto da actuación, que sairá a licitación para a súa execución nos vindeiros días, contempla unha renovación integral da avenida de Barraña no tramo comprendido entre a nova glorieta e a rúa Vimieiro, que, segundo explicaron, “na actualidade presenta numerosas deficiencias funcionais nas beirarrúas, na rede de recollida de pluviais e na rede soterrada de alumeado público, con fallos no alumeado periódicos”.
Para a mellora integral da zona vanse executar novas beirarrúas con pavimento de terrazo pulido e vaise xerar un espazo específico para a mobilidade alternativa mediante a creación dunha primeira fase dun carril bici. Amais, executaranse tres pasos de peóns elevados accesíbeis, co obxectivo de optimizar a mobilidade dos peóns e realizar un control de velocidade no tramo da rúa.
Como dixemos, o proxecto contempla a renovación da totalidade do alumeado, reforzándoa nos cruces, e a colocación de mobiliario específico e árbores para a humanización da avenida.
