O Club Baloncesto Noia caeu na súa visita á Estrada (81-59)

O Berberecho Noia non comezou da mellor maneira esta Primeira División Galega. Os noieses caeron derrotados contra A Estrada nun partido igualado ata o terceiro cuarto, onde os locais se escaparon no marcador para vencer finalmente 81-59.

Foto do CB Noia de Bernabé/Javier Lalín (Faro de Vigo)

Os noieses comezaron o encontro dubitativos e imprecisos, en gran parte provocado polo bo facer da estrada, que dominaron no marcador nos primeiros minutos. No segundo cuarto, os pupilos de Jesu Souto fóronse impoñendo na cancha para conseguir apertar o marcador ao descanso (32-29). Quedaba todo por decidir para a segunda parte.

Logo do paso por vestiarios, a Estrada meteulle máis ritmo ao xogo e comezou a atacar de forma moi cómoda, e o Noia non foi quen de frear o ataque local. Neste terceiro cuarto foi onde se decidiu o partido, cun parcial de 33-15. O último cuarto foi un mero trámite para rematar co resultada final de 81-59.

Con esta derrota, os noieses seguen sen saber o que é gañar nesta tempada 2021-2022 logo de dúas xornadas. Manu, con 16 puntos, foi o home máis destacado dos visitantes.