O Ciclo de Novos Intérpretes de Rianxo trae este venres a Bernal Muíños ao Auditorio Municipal

Segue adiante en Rianxo, con novas e relevantes actuacións, a cuarta convocatoria do Ciclo de Novos Intérpretes que organizan este outono o Concello e a Escola de Música local. O certame comezou o sábado 23 de outubro, ás 20.30 horas no Auditorio, cun concerto a cargo de Óscar Vázquez ao trombón baixo e Yamini Teresa ao piano. A seguinte cita é este venres 29, da man do rianxeiro Bernal Muíños, que virá acompañado do seu cuarteto de jazz. O concerto terá lugar na Sala Arcos Moldes do Auditorio Municipal ás 20.30 horas.

Xa metidos en novembro, o día 12 será a quenda do Víctor Bouzas Quarteto (trompeta), tamén ás 20.30 horas na Sala Arcos Moldes do Auditorio, ao que seguirá o concerto de Alba Franco (arpa) o 26 de novembro, no Auditorio. O ciclo remata con Lucía Mata (fagot) e Diego Mata (piano) o día 10 de decembro, igualmente no Auditorio de Rianxo ás 20.30 horas. En todos os casos cómpre facer as reservas de entrada (gratuíta) na web municipal.