O audiovisual máis comprometido co medio mariño estará presente na Mostra Mares do Fin do Mundo (Outes)

A Mostra Mares do Fin do Mundo (MDFDM) que impulsa o Concello de Outes co obxectivo de dar a coñecer obras destacadas do cinema documental que aborden temáticas de relevancia para o gran piar económico e ambiental da nosa contorna (o mar), porá o foco en cuestións de urxencia como a pesca sustentábel, a protección do medio mariño ou a conservación e posta en valor das comunidades pesqueiras tradicionais e os seus territorios culturais.

Desenvolverase ao longo de catro xornadas, entre os días 29 de outubro e 1 de novembro. Os detalles da mostra serán debullados este venres 22 de outubro ás 12:00h no Centro Náutico do Freixo (Outes), nunha presentación ante os medios de comunicación que contará coa presenza do alcalde Manuel González López, e o director da Mostra, o realizador Marcos Gallego Fernández.

Segundo adiantaron, o certame terá unha nova sección competitiva na que concorren quince filmes internacionais e nacionais, que optarán ao Premio do Público. Asemade, o programa contará con proxeccións especiais, que inclúen a exhibición de distintas obras documentais que terán a súa estrea en España. Todas as proxeccións terán lugar na Casa da Cultura da Serra de Outes nas tardes do 29/10 ao 1/11. As mañás de MDFDM2021 desenvolveranse no Centro Náutico do Freixo, cunha gran variedade de actividades paralelas.

A mostra MDFDM2021 está organizada polo Concello de Outes, coa colaboración na dirección e produción de ABA Films e o apoio da Deputación da Coruña e a Xunta de Galicia. Ademais, Mares da Fin do Mundo forma parte de Proxecta (Coordinadora galega de festivais de cinema).